第一次整大阪燒

呢排突然愛上大阪燒，好掛住之前o係 CWB o個間，可以自己揀鍾意o既材料，又可以自己動手整，好玩又好食，不過好可惜，o個間野已經執左，唯有自己o係屋企試下整啦！

首先要篩左ｄ麵粉先，平時整阿貓野，我唔會過篩架，自己食又唔同！

跟住我買左ｄ蝦，魷魚，椰菜同煙肉，

麵粉加左ｄ鹽之後，就加水開成糊仔咁！

倒一碗仔麵糊，加ｄ椰菜，再加隻蛋，之後撈下佢！

ｄ材料我切細左，應該容易熟，所以我加埋落去！

落鑊煎喇！屋企個平底鑊有坑紋，所以用個大鑊煎，不過都無乜大問題！

煎到咁上下，ｄ粉開始凝固，就可以落埋塊煙肉，之後就反得！

不過”反”呢個部驟對我黎講唔易，好易散，好彩有貓爸出手相助！

最後，加ｄ燒汁同沙律醬就完成喇！

開左o既麵糊夠我煎兩大個，雖然我覺得好好食，不過正在減肥o既我實在唔敢食太多，兩個人食唔哂，下次可以將份量減半！ 

特別鳴謝全晚對我不離不棄o既貓大爺，雖然我知道佢死守廚房o既目的係執死雞，不過有佢o係身邊都係一件好開心o既事！