固體食物初體驗@5M19D

好經又好覺咁

終於等到小霆 BB 5個幾月大喇

可以比佢嘗試下固體食物

先前朋友比左個由中環既兒科醫生提供既參考餐單我

於是我就搵個星期日

(因為姐姐放假, 我可以做第一個餵佢食固體食物既人 ^Ｏ^)

試下跟住個 Schedule 去餵佢

早點: 水果茸

BB 最初開始嘗試食水果

最好就係由蘋果, 啤梨同香蕉開始

唔好一開始就比D古靈精怪既佢

我諗唔會有人一開始比榴槤掛 

小少爺坐定定等食

不過佢阿娘仲未整好

閒時無聊食住手指先

一樣咁好味

睇下佢個樣幾咁神氣

左等右等

點解仲未上菜

開始有D唔耐煩

連圍兜兜都拎黎玩

終於等到第一口蘋果茸

發覺佢都幾 LIKE

心急到幾次捉住我隻手餵快D

麻煩仔食到成面同埋圍兜兜都係

仲要拎圍兜兜黎玩

簡直想挑戰我既底線

終於打完仗

係時候比D水水佢飲下

BB開始接觸固體食物之後

就要習慣下飲水喇

唔係會無便便架

 呢隻學習杯係佢姨婆o係芬蘭帶返黎

我無研究過好唔好用

見佢係6個月以上適用

就二話不說咁拎出黎比佢試下先

唔好以為佢用得有板有眼

好似好叻咁

其實佢倒到周圍都係水囉

唉~~~~~

等我得閒d再去買過隻防漏既比佢先得

一見佢呢個萌樣

就唔忍心同佢計較佢玩到周圍都係水

不過咁

人家都係第一次用

我係唔應該同佢計較既

我真係要多謝佢

佢令我自我提升EQ囉

下午茶: 粥仔

製作粥仔過程簡單

不過最好有工具

好在我咩都唔多

就係無聊野多

之前已經貪玩買左個 Blender用黎打果汁

依家大派用場喇

首先好似平時煲白粥咁

之後再用 Blender 打爛佢

直到完全無渣

小少爺每日只係食少少粥仔

我唔會日日煲比佢囉

所以我會將佢雪成冰

每日食o個陣蒸2-3粒比佢

呢個方法可以將粥仔保存到7日

但係我唔會

我最多3-4日就要清哂佢

剛開始食粥仔

我只係比少少佢

睇佢個衰仔樣

有d唔滿意

不過唔滿意還唔滿意

佢係敵唔過佢阿娘我架

嗯............

雖然佢有食到

不過都只係食左幾啖

睇得出佢係唔多鍾意

反應同食蘋果差好遠

我諗要試多幾次

若果佢真係唔鍾意

我下次會比d米糊仔佢食試下

始終要有野落肚先會長肉架嘛